రొమ్ము పైన దెయ్యం

యం. యుగంధర్ బాబు

మనలో చాలామంది చందమామ కథలు చదువుతూ, వింటూ, పెరిగాము కదా .ఈ తరానికి కూడా ఇప్పుడు చందమామ కథలు ఆన్లైన్లో అందుబాటులోకి వచ్చింది. “చందమామ” పుస్తకం ఒక్కో సంచిక  కూడా ఆన్లైన్లో కనిపిస్తోంది. ఆ కథలలో రాజు, సామాన్యుడు, రాజకుమారి, ఓ బ్రహ్మ రాక్షసి ఉండేవారు. బ్రహ్మ రాక్షసి రాజ కుమారిని తీసుకెళ్లి పోతుంది. చివరికి రాజకుమారుడో, సామాన్యుడో ఆ బ్రహ్మ రాక్షసుడిని ఎదుర్కొని, వాడిని చంపేసి రాజకుమారిని కాపాడే వారు, కథ సుఖాంతం అయ్యేది. ఈ కథ వల్ల ఎవరికి భయం వేసింది కాదు, చెడు పైన మంచి గెలుపు గురించే మన మనసులో నాటుకు పోయేది. ఈ బ్రహ్మ రాక్షసి మన కలలో ఎప్పుడూ భయపెట్టేది కాదు.

కానీ తాత, నాయనమ్మ, అమ్మమ్మా నాన్నగారి స్నేహితులు చిన్నప్పుడు చెప్పిన కథలు మాత్రం చాలా భయానకంగా ఉండేది. మా నాన్న స్నేహితుడు రహీం సాహెబ్ కి ఓ మాంసపు కొట్టు ఉండేది. మాది మిఠాయి అంగడి. అప్పుడు వస్తు మార్పిడి జరిగేది. అంటే మా దగ్గర శుక్రవారం రోజున ఓ కేజీ లడ్డు తీసుకొని ఆదివారం రోజు ఒక కేజీ మటన్ మాకు ఇచ్చేవాడన్న మాట. ఆయన శుక్రవారం వచ్చి మమ్మల్ని (పిల్లల్ని) కూర్చోపెట్టుకొని దెయ్యం కథలు చెప్పేవాడు. “ఒక అమావాస్య రోజు రాత్రి ఆయన ఒక పల్లెటూరు నుంచి సైకిల్ పైన వెనకాల చిన్న గొర్రె పిల్లను కట్టుకొని వస్తూ ఉన్నాడు. ఆ ఊరు బయట వచ్చేసరికి వెనకాల ఏదో బరువు కూర్చున్నట్లయింది. రాను రాను బరువు పెరుగుతోంది. సాయిబు తిరిగి ….చూడు సాయిబు తిరిగి చూడు… అని మాటలు వినిపిస్తున్నాయి. రహీం సాహెబ్ కు నోటి మాట పెగల్లేదు , ముచ్చెమటలు పట్టాయి, వళ్లంతా తడిసిపోయింది అయినా తిరిగి చూడకుండా సైకిల్ తొక్కుతూ ఊరి బయట మర్రిచెట్టు దాటాడు. వెంటనే ఆ బరువు దిగిపోయింది కొంచెం తిరిగి చూస్తే గాల్లో ఒక దయ్యం తేలియాడుతూ “తప్పించుకున్నావు మళ్లీ దొరుకుతావ్ పో” అని మాయమైందట. ఇలాంటి దెయ్యం కథలు చాలా చెప్పేవాడు. ఆ కథలు విని ఎన్నో రాత్రులు ఆ దెయ్యం నా కలలోకి వచ్చేసి నా పైన కూర్చున్నట్లుగా భయపడేవాడిని. ఇది దెయ్యం కల కథ. ఇక అసలు విషయంలోకి వస్తా.

ఇది కొందరికి అనుభవంలో జరిగి ఉంటుంది. మీరు ఓ రాత్రిపూట పడుకున్నారు. ఎప్పటికో కొంతసేపటికి మీకు అధాట్టున  స్పృహ వస్తుంది. కదలలేక పోతున్నారు. మాట్లాడలేక పోతున్నారు. చూడలేక పోతున్నారు ఎంత చేసినా కదలలేక  పోతున్నారు. భయంతో ఎంత గట్టిగా అరుద్దామనుకున్నా చిన్న శబ్దం కూడా బయటికి రావట్లేదు. కానీ మీరు స్పృహలోనే ఉన్నారు. మీ చుట్టూ ఏదో జరుగుతోంది. అది మీకు తెలుస్తోంది. కొద్దిసేపటికి పక్కన ఎవరో వచ్చిన్నట్లు అనిపిస్తుంది. వచ్చి మీ ఛాతి మీద ఏదో బరువైనది కూర్చున్నట్లు అనిపించి మీకు ఊపిరి తీసుకోవడం కష్టం అవుతుంది. మీకు టెన్షన్ తో చెమటలు పట్టేస్తున్నాయి. చాతిలో నొప్పి అనిపిస్తుంది, గుండె దడ అనిపిస్తుంది. అసౌకర్యంగా అనుభూతి పొందుతారు. తిమ్మిరి లేదా జలదరింపు కలుగుతుంది. చలిగా లేదా వేడిగా అనిపిస్తుంది. కడుపు నొప్పి అనిపిస్తుంది. తల తిరుగుతున్నట్టు అనిపిస్తుంది.

ఈ అనుభూతి దాదాపు ఈ భూమి పైన 50% మందికి ఒకసారైనా జరుగుతుంది. కొంతమందికి ఎక్కువ సార్లు పదేపదే జరుగుతూ ఉంటుంది. రెండు ఏళ్ళ పిల్లవాడి  నుండి 80 ఏళ్ల ముసలి వాళ్ళ వరకు  ఇలాంటి అనుభూతులు  జరుగుతూ ఉంటాయి. చాలామంది ఇది దెయ్యం చర్య అని, దెయ్యం మీ రొమ్ము పై కూర్చుని తొక్కుతూ ఉందని భయపెడుతారు. పురాణాలలో ఆత్మ మన శరీరంలోకి దూరడానికి ప్రయత్నిస్తోందని, ఎవరి మీదైన పగవుంటే, లేక తీరని కోరికలు ఉంటే అవి తీర్చుకోవడానికి ఈ విధంగా చేస్తుందని చిలవలు పలవులు కల్పించి చెబుతారు. నగ్నంగా పడుకుంటే లేదా తక్కువ బట్టలతో పడుకుంటే ఇంకా ఎక్కువగా ఇలా జరుగుతుందని ఊదరగొడతారు. వెల్లకిలా పడుకుంటే దెయ్యానికి మీ పనిపట్టే ఆస్కారం ఎక్కువగా ఉంటుందని భయపెడుతారు. మళ్లీ ఈ దెయ్యాలను పాలద్రోలడానికి భూత వైద్యం, శాంతి హోమము,  ఇలాంటి రకరకాల ఖర్చులతో కూడుకున్న ఎపిసోడ్లు మామూలు. ఈ విధమైన భయానుభూతితో చాలామందికి రాత్రిపూట నిద్ర పోవాలంటే భయమేస్తుంది. ఇక దెయ్యం పట్టిందని ముద్ర వేసి వాళ్లని హీనంగా చూడడం సమాజంలో పరిపాటి. ఇది మన దేశంలోనే కాదు ప్రపంచ వ్యాప్తంగా అనేక దేశాలలో జరుగుతున్న తతంగమే. “నిను వీడని నీడను నేనే” అని దెయ్యం ఆ వ్యక్తిని అంటిపెట్టుకుని ఉందని ప్రచారం జరిగిపోతుంది.

ఈ దెయ్యాలు పారదోలే నకిలీ మంత్రగాళ్లు కోకొల్లలు. వేపాకు మండలతో, చింతబరికెలతో దెయ్యం పట్టినట్టు ముద్ర వేసిన వ్యక్తిని చితక బాదడం, మేక పల్ల కోడి పిల్ల, డబ్బులు గుంజుకోవడం. దెయ్యం పోయింది అని భావించి ఇంటికి వచ్చిన తర్వాత మళ్ళీ ఈ రొమ్ముపై తొక్కడం తతంగం జరగడం… మళ్లీ ఇంకొక బూత వైద్యుడినో వెతుక్కోవడం జరుగుతూ ఉంటుంది. కానీ అసలు జబ్బు అయితే నయం కాదు.

నిజానికి ఇది దెయ్యం చర్య కాదు ..భూతము చర్య కాదు‌. ఇది ఒక సాధారణ శారీరిక మానసిక అనుభవం. దీనినే “స్లీప్ పెరాలసిస్”(SLEEP PARALYSIS) నిద్ర పక్షవాతం అంటారు. స్లీప్ పెరాలసిస్ నిద్రపోతున్నప్పుడు లేదా మేల్కొన్నప్పుడు వచ్చే ఒక స్థితి. ఈ సమయంలో మీరు కదలలేరు కానీ  స్పృహలో ఉంటారు. మీరు అనుభవిస్తున్నది ఒక భౌతిక ప్రక్రియ అని తెలుసుకోవాలి. ఇది దెయ్యం చర్య ఎంత మాత్రం కాదు.

నిద్రపోక ముందు భయానక కథలు చదవడం, సినిమాలు చూడడం తగ్గించడం, నిద్రపోయే ముందు మానసిక వత్తిడి తగ్గించుకోవడం, అవసరమైనప్పుడు మానసిక నిపుణులను సంప్రదించడం దీనికి పరిష్కారం. స్లీపింగ్ అప్నియా (Sleeping apnea) కూడా ఒక కారణం కావచ్చు. అంటే శ్వాసనాళిక నిద్రలో కుంచించుకు పోవడం, మెదడుకి ఆక్సిజన్ సరైన మోతాదులో అందకపోవడం, గాలి కోసం గట్టి శబ్దంతో ఉలిక్కిపడి లేచి ఇబ్బంది పడడం జరుగుతూ ఉంటుంది. ఒక్కోసారి నిద్రలో ఎత్తు నుండి కిందకు పడుతున్నట్టు అనిపించడం వెంటనే మంచం మీద నుంచి కింద పడడం జరుగుతుంది. దీనినే హెప్నిక్ జెర్క్ (Hepnic Jerk) అనే శరీర ప్రతిక్రియ అంటారు. నిద్రలోకి జారుతూ ఉన్నప్పుడు అకస్మాత్తుగా కండరాలు కుంచించుకు పోతాయి. మెదడు మనం పడిపోతున్నామనే భావన కలిగిస్తుంది. అందుకే మనం ఒక్కసారిగా లేచిపోతాం.

డాక్టర్ల ప్రకారం ఇది మనం నిద్రపోయిన తర్వాత ఒకానొక స్థితి  REM (rapid eye moment) అనే స్థితిలో ఈ విధంగా జరుగుతాయి. ఈ రాపిడ్ ఐ మూమెంట్ స్థితిలో కలలు ఎక్కువగా వస్తాయి. మెదడు యొక్క కార్యకలాపాలు పెరుగుతాయి. కళ్ళు కనురెప్పల వెనుక వేగంగా కదులుతాయి. మెదడు చాలా చురుకుగా ఉండటంతో పాటు మెదడులోని స్వల్పకాలిక జ్ఞాపకాలు దీర్ఘకాలిక జ్ఞాపకాలుగా మారడానికి ఇది సహాయపడుతుంది. నిద్రలో REM స్థితిలో మెదడు మరియు శరీరము సమతుల్యతలో లేనప్పుడు నిద్ర పక్షవాతం సంభవిస్తుంది. REM నిద్రలో మీ మెదడు చురుకుగా ఉంటుంది. మీరు స్పష్టమైన కలలను  అనుభవిస్తారు. కానీ ఈ కలలను మీ శరీరం నిజం అనుకుని నటించకుండా ఉండడానికి, మీ శరీరాన్ని ఆపడానికి  మీ మెదడు కండరాల కార్యకలాపాలను నిరోధించడానికి సంకేతం పంపుతుంది. దీనివలన తాత్కాలిక పక్షవాతం వస్తుంది.

ఈ రాపిడ్ ఐ మూమెంట్ స్థితిలోనే స్లీప్ పెరాలసిస్ ఎక్కువగా జరుగుతూ ఉంటుంది. కాబట్టి దీనికి పరిష్కారం సరైన డాక్టర్లను సంప్రదించడం, మానసిక వైద్యులను కలవడం. కౌన్సెలింగ్ తీసుకోవడం. అంతేగాని దెయ్యాల పేరుతో భూతాల పేరుతో మంత్రగాళ్ళ చుట్టూ తిరిగి సమయాన్ని, డబ్బులు, ఆరోగ్యాన్ని వృధా చేసుకోకూడదు. రొమ్ము పైన దయ్యం కూర్చోదు. అది చంపాలని ప్రయత్నం చేయదు.