సంపాదకీయం
విజ్ఞాన శాస్త్రపు ప్రయాణాన్ని ,పరిణామాన్ని కూడా చరిత్రగా రాస్తే అదీ మానవ చరిత్రకు నకలుగా కనిపిస్తుంది. కాలం కలిసి రానప్పుడు అప్పటి దాకా జాజ్వల్యమానంగా వెలిగిన చోటి నుండి ఎక్కడ ఠికాణా దొరికితే అక్కడికి సైన్సూ వలస పోయింది .అలా ప్రపంచంలో ఒక్కో యుగంలో ఒక్కో చోట అది కొలువు తీరింది .వెళ్లిన చోటల్లా వెలుగులు చిమ్ముతూ ఆ సమాజాల్ని విప్లవీకరించింది. మళ్లీ కష్టకాలం వస్తే మూటా ముల్లే సర్దుకుని మరో చోటు వెతుక్కుంది .విచిత్రమేమంటే అప్పుడప్పుడూ వెనకబడ్డా ,మానవాళికి మల్లే మళ్ళీ మళ్ళీ దానికి మంచి రోజులే వచ్చాయి. కారణం సైన్సు చరిత్ర మానవ చరిత్ర ఒకటే గనుక !
తొలి నాగరికతల్లో శాస్త్ర సాంకేతికాలు అప్పటి వ్యవసాయ సమాజ అవసరాల్ని గొప్పగా తీర్చాయి.ఈజిప్టు నుంచి హరప్పా దాకా, చైనా నుంచి మొసపొటేమియా దాకా బండ్లు, చక్రాలు ,పడవలు ,లోహాలు, ఖగోళం ,పంచాంగం ,గణితం, కొలతలు ఇలా ఎన్ని ఆవిష్కరణలు ఆ కాలంలో పురుడు పోసుకున్నాయో ! ఈ క్రమంలో ఎన్ని ఇచ్చిపుచ్చుకోవడాలు జరిగాయో! చరిత్రలో అదే మనిషికయినా, సైన్సుకయినా మొదటి మహత్తర కాలం. కానీ కాలం విచిత్రమైంది. ప్రకృతి కన్నెర్రతో,మోయలేని భారంగా మారిన నగరాలతో ఆ మహా నాగరికతలు మట్టిపాలయ్యాయి. “పెట్టుబడీదారీ శైశవాడంబరంగా ” మిగిలి పొయ్యాయి. దీంతో వాటన్నిటా సైన్సుకు తలుపులు మూసుకు పొయ్యాయి .
తర్వాత తూర్పు దేశాల వైజ్ఞానికయుగం మొదలైంది. చైనా భారతదేశాల్ని శాస్త్రవిజ్ఞానం గాఢాలింగనం చేసుకొంది. అప్పటికి ఇనుము మనిషి హస్తగతమైంది.విస్తార వ్యవసాయ క్షేత్రాల్ని అతనికందించింది. దీంతో ఖగోళం, రసాయనం, వైద్యం ,గణితం, గడియారం ,తెరచాప ,కాగితం ,మందుగుండు, దిక్సూచి ఇలా ఎప్పుడూ ఎరగని ఆవిష్కరణలు ఈ దేశాల్ని ముంచెత్తాయి .సరికొత్త సామ్రాజ్యాలు ,తాత్విక చింతనలు పుట్టుకొచ్చాయి .అదో వెలుతురు వెల్లువ. కానీ వాటన్నిటికీ మతఛాందస పునరుత్థానాలు,తిర్యగ్ధోరణులు శాపాలుగా మారాయి.సైన్సు చిన్నబోయింది.
ఆ తర్వాత శాస్త్ర విజ్ఞానం తార్కిక విజ్ఞానాన్ని కూడా వెంటపెట్టుకొని గ్రీకును చేరింది. ఎథిన్స్ గొప్ప వైజ్ఞానిక కేంద్రమైంది. సైన్సు శాఖోపశాఖలుగా విస్తరించింది. రోమ్ వీధుల్లో ఇంజనీరింగు తన విశ్వరూపాన్ని ప్రదర్శించింది. నౌకా నిర్మాణం, జీవశాస్త్రం ,ఖగోళజ్ఞానం ,కొత్త పుంతలు దొక్కాయి . అక్కడా సప్తరుషులు వెలిశారు.కానీ అనుభవ జ్ఞానం లేని భావ వాదం సైన్సును అంతకంటే ముందుకు పోనీకుండా అడ్డుకొంది.దాంతో ఆ శకం ముగిసింది.
ఈ దశలో విజ్ఞాన శాస్త్రం అరబ్బు దేశాలకు చేరుకుంది .తొలి ఇస్లాం సమతావాదం, ఉదారత్వం , యాత్రాభిలాష, జ్ఞానదాహం అన్నిటికీ మించి ప్రపంచం నలుమూలల నుండి విజ్ఞానాన్ని సేకరించే ,స్వీకరించే తత్వం సైన్సుకక్కడ గొప్ప ఆలంబనాలుగా మారాయి. ఎక్కడెక్కడి గ్రంథాలకు అనువాదాలు వచ్చాయి. దీంతో గణిత రసాయన వైద్య జీవశాస్త్ర సముద్రయాన జ్ఞాన రంగాల్లో అరబ్బులు ఎవ్వరికీ అందనంత ఎత్తుకు ఎదిగిపొయ్యారు . కానీ తర్వాత వారు ప్రజాస్వామ్య లక్షణాల్ని పోగొట్టుకున్నాక విజ్ఞాన శాస్త్రం దూరమైంది.
ఆ తర్వాత చరిత్ర మనకు తెలిసిందే. అదే ఆధునిక సైన్సు యుగం. యూరపు వైజ్ఞానిక విప్లవం. పోగుబడ్డ సంపద, వలసల కోసం సముద్రాధిపత్యం ,సాంస్కృతిక పునరుజ్జీవనాలు కలిసి ప్రపంచం ఎప్పుడూ ఎరగని కొత్త సైన్సు శకాన్ని యూరపులో ఆవిష్కరించాయి. ఆవిరి యంత్రాలు ,విద్యుత్తు ,మోటార్లు,రైళ్ళు, విమానాలు ,నౌకలు ప్రజాజీవనాన్ని ఆనవాళ్లు పట్టలేనంతగా మార్చేశాయి.పదార్థ విజ్ఞానశాస్త్రానికి కొత్త రెక్కలొచ్చాయి. యంత్రాలొచ్చి వస్తువులు గుట్టలు పడి యూరపు ప్రపంచాధిపత్యానికి చేరుకుంది .కానీ అది ప్రపంచ యుద్ధాల్ని నెత్తికెత్తుకొని చతికిలపడ్డంతో ఆ హోదాను కాస్తా అమెరికా తన్నుకెళ్ళింది .
ఇప్పుడు ఆధునిక శాస్త్ర విజ్ఞానమంతా అమెరికా గుప్పిట్లో వుంది .అణుశక్తి నుంచి అంతరిక్ష విజ్ఞానం దాకా దాన్ని ఢీకొనగల వారు లేరు. సమాచార సాంకేతికత నుండి కృత్రిమమేధ దాకా దానికి తిరుగులేదు. ఆధునిక వైద్యం నుంచి రోబోట్స్ దాకా దానికి ఎదురులేదు. ప్రపంచ ప్రఖ్యాత విశ్వవిద్యాలయాల్లో సింహభాగం అమెరికాలోనే వున్నాయి. ఎక్కడెక్కడి సుప్రసిద్ధ శాస్త్రవేత్తలు వాటిలోనే వున్నారు. ప్రతి ఏటా నోబుల్ అవార్డు గ్రహీతల్లో సగానికి సగం అమెరికన్లే. అది పరిశోధనల మీద (2023 )పెట్టే ఖర్చు 834 బిలియన్ల డాలర్లు !ఒక్క మాటలో చెప్పాలంటే అమెరికా ప్రపంచాధిపత్యమంతా దాని వైజ్ఞానిక శక్తి మీదనే ఆధారపడి వుంది .ఎప్పటికప్పుడు అత్యాధునిక ఆవిష్కరణలు చేస్తూ పరిశోధనా రంగాన్ని పరుగులు పెట్టించడంపైనే వుంది .ఈ పోటీలోకి మరెవ్వరూ దరిదాపులకు కూడా రాలేరని ఇప్పటిదాకా అందరం అనుకున్నాం !
కానీ ఇటీవల చూస్తే వ్యవహారం ఉల్టా అయ్యేలా వుంది .దాని సంకుచిత తిరరోగామి తత్వం , పెత్తందారీవిధానం, ఆర్థిక మాంద్యం ,విదేశీ సంబంధాలు ,పెట్టుబడులు ,రాజకీయ దృక్పథం -ఇలా ప్రతిదీ శాస్త్ర సాంకేతిక రంగాల్లో అమెరికా అగ్రస్థానానికి ఎసరు పెట్టేలా వున్నాయి .చరిత్రలో ఒకనాడు భారతదేశానికేమి జరిగిందో, అరబ్బు దేశాలకేమి జరిగిందో ఇప్పుడు అమెరికాకూ అదే పునరావృతమయ్యేలా వుంది .మళ్లీ చక్రం వెనక్కి తిరిగి తూర్పు దేశాల్లో వైజ్ఞానిక వైభవం ముందుకొచ్చేలా ఉంది.
ట్రంపు అధికారంలోకి వచ్చాక 1000 శాస్త్ర సాంకేతిక సంస్థలకు నిధులు నిలిచిపోయాయి. జాతీయ క్యాన్సర్ సంస్థకు బడ్జెట్లో 30 శాతం కోతబడింది .బిగ్ బ్యూటిఫుల్ చట్టం నేషనల్ సైన్స్ ఫౌండేషన్ కు నిధుల కేటాయింపుల్ని 56 శాతం తగ్గించింది .నాలుగు వేల పరిశోధనలకు గ్రాంట్లు నిలిచి పొయ్యాయి. చివరకు 2023లో నోబుల్ అవార్డు సంపాదించి పెట్టిన ఆర్ఎన్ఏ వ్యాక్సిన్ ప్రాజెక్టు కూడా ఆర్థికంగా కష్టాల్లోకి పోయింది. ఇక హెచ్ఐవి, టీబి,మలేరియా ,క్యాన్సర్ వంటి ప్రాణాంతక వ్యాధులపై పరిశోధన సైతం క్రమంగా అటకెక్కుతోంది !
దీంతో జాన్ హాప్కిన్స్ లాంటి గొప్ప విశ్వవిద్యాలయం నుంచి సైతం విద్యార్థులు ఆక్స్ఫర్డ్ వంటి సంస్థలకు క్యూ కడుతున్నారు. దాదాపు 1.50 లక్షల విద్యార్థులు అమెరికాకు మొహం చాటేస్తున్నారని “గార్డియన్” పేర్కొంటే, దీనివల్ల ఏడుబిలియన్ల డాలర్లు నష్టమని “ఫోర్బ్స్ “చెప్పుకొచ్చింది.
అమెరికా ధోరణి ఇలా వుంటే చైనా తన విద్యార్థులందరినీ విదేశాల నుంచి వెనక్కి రప్పించుకుంటోంది.Nature Index ReasearchLeaders Rankings (31 డిసెంబరు 2024) ప్రకారం బయోసైన్సు, రసాయన శాస్త్రం, భౌతిక శాస్త్రం, భూ పర్యావరణ శాస్త్రాలు, ఆరోగ్య శాస్త్రాల్లో చైనా పరిశోధనలతో సరితూగేవి నేడు ఏ దేశంలో లేవు. పరిశోధనా రంగంలో హార్వర్డ్ విశ్వవిద్యాలయాన్ని ‘చైనా సైన్సు అకాడమీ’ ఇప్పటికే వెనక్కి నెట్టేసింది. చైనాలో 2015 నాటికే ఓ డజను దాకా ప్రపంచ స్థాయి విశ్వవిద్యాలయాలున్నాయి .అంతర్జాతీయ వైజ్ఞానిక పరిశోధనారంగానికి చైనా దోహదం అమెరికాను అధిగమించే రోజులు అతి సమీపంలో వున్నాయి. ప్రపంచ స్థాయిలో ఉట్టంకించబడే (Cited) అత్యంత ప్రామాణిక పరిశోధనా పత్రాల్లో 27.2% చైనావి .పరిశోధనా రంగానికి చైనా బడ్జెట్ కూడా 780.7 బిలియన్ల డాలర్లకు చేరుకుంది .ఇది ప్రతి ఏటా 8.7% పెరుగుతోంది . అమెరికా పెరుగుదల మాత్రం 1.7% మించి లేదు .
ఇక అత్యాధునికశాస్త్ర పరిశోధనా రంగాల్లోనూ చైనా దూకుడు ఇలానే వుంది. శాన్ ఫోర్డ్ యూనివర్శిటీ AI ఇండెక్స్ రిపోర్టు(2023) ప్రకారం కృత్రిమ మేధ పరిశోధనా పత్రాల్లో 40 శాతం చైనావి. అమెరికా వాటా కేవలం పది శాతం. క్వాంటం రీసెర్చ్, సెమీ కండక్టర్స్ ,బ్రాడ్ బ్యాండ్ ఇన్ఫర్మేషన్ ,నానో మెటీరియల్స్, స్మార్ట్ రోబోట్స్ ఫ్యూయల్ సెల్స్, కాస్మిక్ డిటెక్టర్స్ లాంటి రంగాల్లో కేంద్రీకరించి పరిశోధనలు చేసేందుకు ఇటీవల చైనా 15వ పంచవర్ష ప్రణాళిక విశ్వ విద్యాలయాలకు, శాస్త్ర పరిశోధనా సంస్థలకు పుష్కలంగా నిధులందించాలని నిర్ణయించింది. ప్రపంచంలోనే పరిశోధనా రంగానికి అత్యంత భారీ పెట్టుబడి త్వరలోనే చైనాది కానుంది. దూరదృష్టితో ఆధునిక శాస్త్ర సాంకేతిక రంగాల పునాదినది పటిష్టం చేసుకుంటోంది .
ఇలా చూస్తే తమ పూర్వ వైజ్ఞానిక వైభవాన్ని తూర్పు దేశాలు మళ్ళీ సంతరించుకోబోతున్నాయా అనిపిస్తుంది. ప్రాగ్దేశాల ప్రాంగణంలో సరికొత్త శాస్త్ర సాంకేతికాలు కాంతి ధారల్ని కురిపించబోతున్నట్లనిపిస్తోంది.
మరి అలనాడు చైనాతో సమ ఉజ్జీగా వున్న మనం ఇప్పుడీ నూతనశాస్త్రస్పర్ధాసమరంలో ఎక్కడున్నాం? మనకు మనం ఎన్ని బడాయిలు చెప్పుకున్నా ప్రపంచం మాత్రం మన వైపు చూడ్డం లేదన్నది సత్యం!
